POPULUS Alba

POPULUS Alba

Herculi olim sacra, quod is eam, in Thesprotide ad amnem Acherontem primum inventam, secum in Graeciam detulisset, Pausan. l. 5: Idem ex ea coronam sibi fecit, ut testatur Olympionicus, l. de Plantis, mansitque postea consuetudo, ut in sacris Sacerdotes iisdem sertis coronarentur. Sed et ut Theocriti Enarrator scribit, Victoribus praemia in publicis agonibus ex populeis parari ramis consuevêre. Ex alba porro populo duntaxat, neque ex ulla alia arbore, ad usum sacrorum Olympii Iovis, ligna caedi patrium fuisse Eleis ritum, idem pausanias praefatus loc. cit. tradit, quem honorem arbori Herculis causâ habitum verisimile est. Eadem Stagiris in Musaeo renascens, Imperii revirescentis fuit omen: Quem admodum Nuceriae ulmus in luco Iunonis, amputatô cacumine, quoniam in aram ipsam procumbebat, restituta sponte, ita ut protinus floreret, Maiestatem populi Romani, Cimbricis cladibus vestatam, feliciter resurrecturam, portendit: quod et in Philippis factum salice prociduâ, et procumbente, Plin. l. 16. c. 32. Nec omittendum, Populi, myrti et aloes foliis stipatos, Pythagoraeos humi mandatos olim fuisse, quomodo et M. Catonem voluisse humari, docet Alexand. ab Alex. l. 3. c. 2. apud Novum Murum (qui locus inter Smyrnam et Cumas Aeolicas medius est) ad Herodoti usqe tempora, annis sexcentis triginta, et amplius, locum fuisse ostensum, in quo Homerus sedens carmina sua legenda exhibuerit, et magna habitus fuerit in veneratione: memoratumque, Populum arborem ab eius adventu in eodem loco enatam, ipse scribit herodotus in Vita Homeri. Sucum arboris in electrum indurescere, contendit Thom. Dempster. in Rofin. Paralipom. l. 5. c. 30. qua de re vide supra. Funeris, Temporis, Candoris ac Religionis hieroglyphicum, arborem facit Pierius. Ad eius in coronis usum ut redeam, exemplô Herculis etiam coeteri Heroes illâ fronde redimiti gestiêrunt, uti de Teucro docet Horat. Carm. l. 2. Od. 3. Athletae item, teste Artemidorô, l. 2. c. 25. Amantes porro, apud Lucian. de Imag. fortasse διὰ τὸ ἔυμηκές τε καὶ ὄρθιον, propter longitudinem et rectitudinem. Convivae tandem inipublica laetitia: uti de Euandri convivis cum Cacus ab Hercule exstinctus esset, legimus, apud Virg. Aen. l. 8. v. 276.

Dixerat, Herculeâ bicolor cum populus umbra

Velavitque comas, foliisque innexa pependit.

Quem quoque Saliorum habitum fuisse, ibidem legas. Sed et per istiusmodi coronam iuravit Hercules, apud Val. Flaccum, Argonautic. l. 6. etc. Vide Car. Paschal. coronar. l. 2. c. 11. et l. 4. c. 2. uti de Populea Virga, in puerperiis olim depactâ, infra ubi de Virgis Natalitiis.